Þegar við vorum lítil og lásum norrænu goðafræðina okkar fór mikið fyrir þrumuguðinum Þór. Sögurnar af honum eru krassandi. Eitt var þó snúið að skilja: þrumurnar sem Þór er kenndur við.

Í Genf er þessu öfugt farið. Þar þekkja fáir þrumuguðinn og sögurnar norrænu, en þrumur og eldingar þekkja allir. Þrumuveðrið er fastur hluti af sumarupplifuninni á meginlandinu. Drunur í fjarska, sjónarspil á himni og hellidemban sem vætir jörð og fólk.

Á tuttugasta og fjórða gleðidegi þökkum við fyrir náttúruna sem minnir á sig og sögurnar sem mannfólkið hefur sagt hvort öðru til að skýra og skilja.

Fjórði maí er kær aðdáendum Stjörnustríðs. Í dag viljum við þakka fyrir stórsögurnar á hvíta tjaldinu. Þær hafa verið ungum og öldnum innblástur um baráttu góðs og ills, hetjur og andhetjur. Þær eru endalaus uppspretta fyrir samtöl og vangaveltur.

Remember: pic.twitter.com/nat15FQ50I

— Unvirtuous Abbey (@UnvirtuousAbbey) May 4, 2020

Í heimavistinni er ástæða til að borða hollan mat. En stundum langar okkur í eitthvað annað. Eitthvað óhollt sem lyftir hug í hæðir og skapar vellíðan. Til dæmis samloku með hnetusmjöri og sultu. Hér er uppskrift.

Hvað finnst þér gott að borða í heimavist?

Bíómyndin um Tröllin er í miklu uppáhaldi hjá okkur. Peppaða prinsessan Poppy er skemmtileg kemst langt með jákvæðu viðhorfi til lífsins. Það sýnir meðfylgjandi myndbrot vel. Á tuttugasta gleðidegi þökkum við fyrir jákvæða fólkið í lífinu.

Í heimavistinni eigum við meiri samskipti á netinu en áður. Á nítjánda gleðidegi langar okkur að deila með ykkur þremur spurningum sem allir ættu að spyrja sig áður en skrifað er á netið:

1. Er þetta satt?
2. Er þetta nauðsynlegt?
3. Sýnir þetta umhyggju?

Eins og Páll skrifaði: “Allt er leyfilegt en ekki er allt gagnlegt. Allt er leyfilegt en ekki byggir allt upp.” (1Kor 10:23)

Sjálfbærnimarkmið Sameinuðu þjóðanna geta verið rammi fyrir endurreisn og umbætur í kjölfar COVID-19 heimsfaraldursins.

Það segja Nano Addo Dankwa Akufo-Addo, forseti Ghana, og Erna Solberg, forsætisráðherra Noregs. Þau sitja saman í forsæti einnar af nefndum SÞ um sjálfbærnimarkmiðin og skrifa í pistli sem birtist í dag:

“Við höfum lært – sem íbúar heimsbyggðarinnar – hversu mikils virði það er að við gætum hvers annars, vinnum saman að því að enginn sé skilinn eftir, og forgangsröðum í þágu þeirra sem minnst mega sín.”

Stundum er sagt að góður mælikvarði á samfélag sé hvernig það kemur fram við þau sem minnsta eiga undir sér. Það má heimfæra þann mælikvarða á heimsbyggðina.

Á átjánda gleðidegi þökkum við fyrir sjálfbærnimarkmiðin og þau öll sem vinna að markmiðin eins og ekkert hungur, fullt jafnrétti og útrýming fátæktar verði að veruleika.

Á mánudögum les Michelle Obama barnabækur á rás PBS Kids á YouTube. Hún er í uppáhaldi og eins og lestur með börnum. Á sautjánda gleðidegi þökkum við fyrir Michelle og barnabækurnar.

https://youtu.be/WyhgubvRYF4

Það rigndi í dag, í fyrsta sinn í langan tíma. Skraufþurr jörðin tók vel við. Í 147. sálmi er fjallað um regnið sem gjöf frá Guði:

Syngið Drottni þakkargjörð,

leikið fyrir Guði vorum á gígju.

Hann hylur himininn skýjum,

sér jörðinni fyrir regni,

lætur gras spretta á fjöllunum,

gefur skepnunum fóður þeirra,

hrafnsungunum þegar þeir krunka.

Sálmur 147

Á sextánda gleðidegi þökkum við fyrir náttúruna og regnið sem kemur með blessun að ofan.