Hurðarkransinn í ár er öðruvísi og endurspeglar breyttan lífsstíl fjölskyldunnar. Innblásturinn er sóttur til vina á Facebook sem deildu skemmtilegri mynd. Kristín föndraði og við njótum öll.
Blogg
Færslur um hvaðeina sem okkur þykir áhugavert. Notaðu hnappana til að sía eða flettu gegnum allt.
-
-
Jafn gott og jólalögin
Það er gaman að ganga um miðbæinn í Reykjavík árla dags eða þegar liðið er á daginn á aðventunni. Þá birtist ljóslifandi hugmyndaauðgi fólksins sem starfar í verslunum og hefur skreytt hús og glugga.
Ljósjólatré í verslun í miðbænum. Fallegar skreytingar lyfta hug í hæðir rétt eins og uppáhalds jólalög og sálmar gera. Ég fann þetta jólatré sem er gert úr gamaldags ljósaperum á Skólavörðustígnum. Þetta er bæði snjöll og falleg útfærsla.
-
Eitt hundrað sjötíu og sex orð um sparnað og svita
Það er inni að hjóla í Reykjavík.
Sífellt fleiri kjósa hæga lífsstílinn og hjóla til og frá vinnu allan ársins hring. Reiðhjólið er líka ein einfaldasta og skjótvirkasta aðferðin til að auka ráðstöfunartekjur heimilisins verulega. Það getur jú munað allt að 100 þúsund krónum á mánuði að vera á bíl eða hjóli þegar allt er talið með.
Í skammdeginu þurfa að vera góð ljós á hjólinu. Sumir klæða sig í hjólagalla, gjarnan úr spandexi, fara í sérstaka hjólaskó, og stíga svo upp á létt og hraðskreitt götuhjól sem má nota til að komast hratt og örugglega milli staða.
Aðrir vilja vera í skrifstofugallanum og velja sér þyngra borgarhjól með færri gírum. Á slíku hjóli situr hjólreiðamaðurinn uppréttur, tekur á sig mikinn vind og kemst hægar yfir, en fær um leið tíma til að upplifa og íhuga meðan á ferðinni stendur.
Allir njóta þess að upplifa borgina okkar frá öðru sjónarhorni og renna sína leið framhjá umferðarteppunum milli átta og níu og fjögur og fimm. Koma kannski svolítið sveittari heim en alveg örugglega glaðari.
-
Þú ert of mikilvægur til að fara ekki í fæðingarorlof
Í Fréttablaðinu og á Vísi í dag er sagt frá því að færri feður fari í fæðingarorlof en undanfarin ár. Samkvæmt fréttinni hefur hlutfallið lækkað úr 90% í 77% frá 2009 til 2014. Þetta eru slæmar fréttir. Mig langar því að birta hér á blogginu stutt bréf til nýbakaðra feðra sem eru að velta fyrir sér hvort þeir eigi að fara í fæðingarorlof eða ekki.
Þetta er Heiðbjört Anna sem naut þess að vera með pabba og mömmu í fæðingarorlofi. Kæri faðir.
Ég hef þrisvar sinnum verið í fæðingarorlofi. Þetta hefur alltaf verið góður tími. Ég veit að hann hefur skipt mig miklu máli og er viss um að dæturnar hafa notið hans líka. Ég er líka sannfærður um að þetta hefur haft heilmikil áhrif á samband okkar.
Staðreynd málsins er sú að tíminn okkar með börnunum okkar skiptir máli. Árin líða hratt og fyrr en varir eru þau orðin hálffullorðin og við höfum misst af mótunarárunum. Ég á því aðeins eitt ráð til þín sem ert að velta fyrir þér hvort þú eigi að taka fæðingarorlof:
Ekki hugsa þig um tvisvar. Farðu í fæðingarorlof og njóttu þess með börnunum þínum og fjölskyldunni.
Að eiga þrjá eða fleiri mánuði með barninu sínu eru nefnilega forréttindi. Vinnan getur beðið og verkefnin líka. Barnið getur hinsvegar ekki beðið.
-
Er Biblían of löng?
Það er líklega sjaldnast sem við lesum alla Biblíuna í einu, alla jafna er henni skipt upp í smærri einingar. Í messunni á sunnudögum lesum við til að mynda þrjá lestra, einn úr Gamla testamentinu, tvo úr því nýja. Svo eru til margs konar lestraskrár sem má fylgja.
En hvað gerum við ef við viljum draga kjarnann í Biblíunni saman? Það er þekkt að Marteinn Lúther sagði að við ættum að lesa hana með það í huga hvað efldi Krist. Hvernig á að skilja það er reyndar annað mál. Það er líka hægt að fara allt aðrar leið. Ein slík tilraun var birt á reddit í síðustu viku og þar segir meðal annars:
Guð: Ok, þið tvö, það er eitt sem þið megið ekki gera. Annars er þetta bara spurning um að skemmta sér vel.
Adam og Eva: Allt í lagi.
Satan: Má ég stinga upp á einu?
Adam og Eva: Allt í lagi.
Guð: Hvað gerðist!?!
Adam og Eva: Sko, það var þarna eitt sem við gerðum.
Guð: Krakkar!Ég snaraði þessu á íslensku í gær, svo að fleiri fái notið. Hvernig mynduð þið annars draga kjarnann í Biblíunni saman?
-
Fimm fílar í Berlín
Á Five Elephant fæst afbragðs gott kaffi og frábær ostakaka. Five Elephant er eitt af góðu kaffihúsunum í Berlín. Þau rista sitt eigið kaffi og hella upp á dýrindis espressodrykki og bjóða líka upp á nútímalegan gamaldags uppáhelling. Þar fæst líka besta ostakaka í heimi, skv. Torfa vini okkar á Reykjavík Rosters.
Five Elephant er í Kreuzberg sem er eitt af uppáahaldshverfunum í borginni, það er iðandi lífi og fullt af listilega skreyttum húsum sem gerir göngutúra um hverfið enn betri en ella.
-
Karlar þurfa að leggja sitt af mörkum
til að konum finnist þær vera öruggar í borginni okkar. Það er eitt af markmiðum átaksins Örugg borg. Ólafur Stephensen skrifar í Kjarnann í dag:
Við karlarnir eigum einfaldlega að vera sammála um að það er aldrei í lagi að beita ofbeldi, áreita konur eða sýna þeim ógnandi framkomu. Allir ljósastaurar heimsins taka ekki í burtu óttann og öryggisleysið sem margar konur upplifa. Að búa til öruggara borgarumhverfi að þessu leyti er á endanum undir okkur körlunum komið.
Við þurfum að leggja okkar af mörkum.
Ps. Nei, ég er ekkert að plögga Kjarnann sérstaklega, fann bara gott efni þar, tvo daga í röð.
-
Mánudagsmeðmæli: Pabbi, mamma, börn og bíll
Mánudagsmeðmælin fá Kjarninn og Guðmundur Pálsson fyrir hlaðvarpsþáttinn Pabbi þarf að keyra sem er bráðskemmtilegur. Guðmundur er auðvitað alvanur útvarpsmaður og góður pistlahöfundur og hér gefur hann skemmtilega innsýn í líf fjölskyldunnar sem kvaddi hversdagsbaslið og hélt á vit ævintýranna í Evrópu.
Hlaðvarpið er á uppleið á Íslandi. Alvarpið ruddi því leið. Nú kemur Kjarninn sterkur inn og fleiri eiga vonandi eftir að bætast í hópinn. Mér finnst alveg frábært að geta hlustað á stutta og skemmtilega íslenska þætti á leiðinni í vinnuna. Takk fyrir mig.
-
Fimmtán sekúndur um forgangsröðun
Guðspjall þessa sunnudags í kirkjunni fjallar um forgangsröðun. Hér er fimmtán sekúndna prédikun.
