Aðventa og jól eru tími freistinga í mat og hreyfingu. Allskyns góðgæti freistar reglulega á aðventunni og við viljum gjarnan njóta góðs matar með góðri samvisku. Í aðdraganda jóla mæðumst við líka í mörgu og mörgum reynist erfitt að taka tíma í reglulega hreyfingu.
Gaui þjálfari hjá Kettlebells.is deildi fimm ráðum með vinum sínum á Facebook til að komast í gegnum jólavertíðina í jafngóðu eða betra formi. Þetta byggir á 40 daga áskoruninni sem ég fór í gegnum með þeim. Ráðin fimm eru:
Farðu í klukkutíma göngutúr á hverjum degi fram að áramótum. Sama hvernig veður er.
Andaðu með nefinu til að vinna gegn streitunni sem fylgir aðventu og jólum. „Með því að anda inn um nefið, ofan í þindina, heldur maður ró sinni. Þetta er gömul, en því miður mikið til gleymd, viska. Það er erfitt að vera stressaður ef maður andar rólega á þennan hátt.“
Fylgdu áætlun dagana sem þú ferð í jólahlaðborð: a. Borðaðu létt yfir daginn, b. puðaðu vel í 30 mínútur 2-3 klukkutímum fyrir veisluna, c. slepptu brauði og súpu á hlaðborðinu en fáðu þér gott kjöt og góðan fisk og gott meðlæti, d. borðaðu hægt og njóttu matarins.
Labbaðu í kjörbúðina og haltu á pokunum heim. Það er góð æfing. Passaðu þig að vera bein/n í baki og horfa fram á veginn.
Taktu Nelson Mandela þér til fyrirmyndar: „ Finndu það góða í fólki, ekki tala illa um aðra, fyrirgefðu þeim sem hafa gert þér illt, hlustaðu meir en þú talar, vertu góð fyrirmynd, hugsaðu vel um eigin heilsu, trúðu á réttlæti, aldrei gefast upp og hafðu gaman af lífinu.“
Fimm einföld ráð sem gera hæfilega miklar kröfur til okkar og auka lífsgæðin. Gaui útskýrir hvert skref nánar á Facebook. Kíkið á það og njótið aðventunnar og jólanna.
Árni Svanur við Daginn í dag gluggann í Kirkuhúsinu. Hafdís horfir á. Mynd: Gunnar V. AndréssonÉg fékk skemmtilegt símtal um daginn frá blaðakonu á Fréttablaðinu sem vildi forvitnast um jóladagatal kirkjunnar.
Við ræddum saman í svolitla stund og svo fékk ég heimsókn frá Gunnari ljósmyndara sem tók mynd af mér með Hafdísarglugga í baksýn. Viðtalið birtist svo í Fréttablaðinu um helgina og á Vísi.is í gær:
Jóladagatal kirkjunnar er ekki eins og súkkulaðidagatal sem klárast því hægt er að opna gluggana aftur og aftur og upplifa hlýju og kærleika á ný,“ segir Árni Svanur Daníelsson, vefprestur þjóðkirkjunnar, um heillandi dagatal kirkjunnar sem lætur engan ósnortinn.
„Síðast bjuggum við til jóladagatal fyrir þremur árum þegar þjóðin var í sárum vegna efnahagshrunsins. Þá var þemað von því okkur þótti mikið skorta á vonina hjá landsmönnum,“ útskýrir Árni Svanur.
Kristjana Stefánsdóttir og Svavar Knútur syngja á jólatónleikunum Eitthvað fallegt í Víðistaðakirkju
Við fórum á jólatónleikana Eitthvað fallegt með Svavari Knúti, Kristjönu og Ragnheiði í vikunni. Þetta var dásamlegt kvöld með fallegu lögunum af samnefndri jólaplötu. Þau flétta saman klassísk og frumsamin jólalög, útsetningar eru lágstemmdar og mínimalískar og hæfa vel á aðventu. Þarna er engu ofaukið og ekkert skortir. Við skemmtum okkur konunglega og það gerði Heiðbjört Anna líka.
