Blogg
Færslur um hvaðeina sem okkur þykir áhugavert. Notaðu hnappana til að sía eða flettu gegnum allt.
-
Aðventuáskorun
Jóhanna æskulýðsfulltrúi í Langholtskirkju hitti krakka úr Langholtskirkju á dögunum. Hún skoraði á þau og það er ástæða til að taka undir þessa áskorun:
Þannig að nú ætla ég að koma með smá aðventu-áskorun. Hvað segið þið um að við sameinust öll um að gera eitt góðverk heima fyrir áður en við förum að sofa í kvöld? Það þarf ekki að vera risastórt eða taka langan tíma, það getur verið til dæmis að fara úr með ruslið, ganga frá eftir kvöldmatinn eða gefa gamla fólkinu óvænt gott faðmlag og koss á kinn.
-
Skólinn, kirkjan og aðventan – nokkrar vísanir
Á þessari aðventu hefur verið mikið rætt um vettvangsferðir skólanna í landinu í kirkjurnar. Okkur langar að safna saman vísunum á efni sem hefur verið skrifað á einn stað, til að auðvelda yfirsýn og hjálpa okkur að skilja rökin sem eru notuð. Það mun því bætast við færsluna eftir því sem á líður.
Pistlar
- Boðun, pólitík og kirkjuheimsóknir e. Sigríði Guðmarsdóttur
- Mannréttindi og kirkjuheimsóknir e. Sigurvin Lárus Jónsson og Sunnu Dóru Möller
- Kirkjuheimsóknir skólanna e. Svavar Alfreð Jónsson
- Jólaguðstaglið e. Vantrú
- Trú er einkamál, kristni er þjóðmenning e. Pál Vilhjálmsson
- Jólahefð eða innræting e. Hildi Sverrisdóttur
- Ofmetin ríkiskirkja e. Jónas Kristjánsson
- Kirkjuheimsóknir á aðventu e. Ragnar Þór Pétursson
- Frjálslyndi og hlutleysi e. Ragnar Þór Pétursson
- Innrætingin e. Gunnlaug Stefánsson
Fréttir
- Segir heimsóknina í samræmi við reglur – Mbl
- Ósátt við kirkjuferð Langholtsskóla – Pressan
- Kom sár og dapur heim: „Bekkjarbræður hans voru víst að gera grín af því að hann skuli ekki trúa á guð“ – DV
Ps. Í vísun felst engin afstaða til efnis pistlanna, þetta er bara tilraun til að ná utan um umræðuna. Lesandinn athugi það.
-
Þolandi heimilisofbeldis og mansals
Heilög Lúsía er táknmynd fyrir örlög kvenna sem eru undir ákvarðanir og vald annarra settar. Hún er þolandi heimilisofbeldis og mansals eins og kynsystur hennar um allan heim enn þann dag í dag. 13. desember er dagurinn hennar.
Ofbeldi gegn konum er stór og svartur blettur á menningu okkar og því er við hæfi að staldra við einmitt á svartasta tíma ársins og horfast í augu við þær konur sem hafa lifað og dáið við kerfisbundna beitingu ofbeldis í skjóli fjölskyldutengsla eða hefða.
-
Hjólin og jólin
Hurðarkransinn í ár er öðruvísi og endurspeglar breyttan lífsstíl fjölskyldunnar. Innblásturinn er sóttur til vina á Facebook sem deildu skemmtilegri mynd. Kristín föndraði og við njótum öll.
-
Jólastjarnan boðar sátt
Eitt af uppáhaldsjólalögunum okkar er Jólastjarnan eftir Braga Valdimar Skúlason. Þar sækir hann í smiðju jólafrummyndanna um hlýju og öryggi, ljós í myrkri, börn og fjölskyldur. Jólastjörnunni sem boðar sátt og breiðir út hlýju, er sungið lof en líka er spurt hver huggi þann sem skærast skín. Við rákumst á þessar fallegu jólastjörnur á Lúsíumarkaði í Kulturbrauerei í Berlín á dögunum. Þær skína skært eins og jólaljósin fallegu á aðventunni á Íslandi.
-
Þegar skammdegið er mest
Þegar skammdegið er mest
kveiki ég aðventuljós og minnistjólanna sem nálgast …
Jesú sem fæddist í Betlehem …
boðskapar englanna um frið á jörð …
stjörnunnar sem lýsir okkur til Jesú
Megi ljós aðventunnar minna mig á ljós himnanna.
Á öðrum sunnudegi í aðventu langar okkur að deila með þér þessari bæn úr Bænabók barnanna. Guð gefi þér góðan dag.
-
Bráðum
Aðventan kom með látum þetta árið, með óveðri og aflýstum aðventukvöldum. Lætin eru skemmtileg andstæða við innreið Jesú í Jerúsalem sem einkenndist öðru fremur af látleysi. Aðventan er tími eftirvæntinganna, nú hefst undirbúningurinn fyrir alvöru, nú hefst biðin og allt miðar að stundinni helgu þann tuttugusta og fjórða.
Okkur finnst sálmurinn hans Arnar Arnarsonar sem er tónlistarstjóri Fríkirkjunnar í Hafnarfirði ná vel að fanga kjarna þess tíma sem aðventan er. Þess vegna viljum við deila honum á blogginu í dag.
Þótt dauf sé dagsins skíma
og dimma okkur hjá,
við bíðum bjartra tíma
því bráðum kemur sá
sem ljós af ljósi gefur,
nú lífið sigrað hefur!
Við lofum hann Guðs son
sem gefur trú og von.Við fögnum því við fáum
að halda heilög jól.
Hann kom frá himni háum
og hann er lífsins sól.
Herskarar engla´ og manna
nú syngja „Hósíanna!“.
Við lofum soninn þann
sem boðar kærleikann.Okkur langar, á fyrsta mánudegi aðventunnar, að bera fyrir lesendur bloggsins spurningu. Hún er þessi: Hvaða vonir berð þú í brjósti á aðventunni? Þið megið svara hér á vefnum eða senda okkur línu á arni (hjá) p2.is.
Takk fyrir að lesa.
-
Jólakranar handa þeim þyrstu
Fyrstu versin í Biblíunni greina frá því þegar Guð skapar himinn og jörð (1. Mós 1). Ástandinu sem ríkir áður en Guð byrjar að skapa er lýst þannig að jörðin var auð og tóm, og andi Guðs sveif yfir vötnunum. Áður en nokkuð annað verður til, ljósið, landið, gróðurinn, dýrin og manneskjan, er vatnið til. Vatnið var með Guði í upphafi sköpunarinnar.
Þessi sérstaða vatns í kristinni heimsmynd kemur vel fram í því að kirkjan talar um Guð með vatnsmyndum. Guð er uppspretta hins lifandi vatns og hinn trúaði þráir samvistina með Guði eins og hindin þráir vatnslindir (Sálm 42.2). Umhyggja Guðs gagnvart manneskjunni er sömuleiðis tjáð með vatnsveituorðfæri þegar spámaðurinn Jesaja segir fyrir hönd Drottins: „Ég leiði vatn um eyðimörkina og ár um öræfin til þess að svala lýð mínum, mínum útvalda“ (Jes 43.20).
Jólasöfnun Hjálparstarfs kirkjunnar hefst formlega í dag. Hún er vatnssöfnun og miðar að því að mæta þörfum okkar allra fyrir vatn með því að grafa og reisa vatnssöfnunartanka í Úganda og Eþíópíu. Þú getur lagt þitt af mörkum með því að greiða valgreiðslu í heimabanka, hringja í söfnunarsímann 907 2003 og greiða þannig 2500 krónur, gefa á framlag.is eða leggja beint inn á söfnunarreikning: 0334–26–50886 kt. 450670–0499.
-
Jafn gott og jólalögin
Það er gaman að ganga um miðbæinn í Reykjavík árla dags eða þegar liðið er á daginn á aðventunni. Þá birtist ljóslifandi hugmyndaauðgi fólksins sem starfar í verslunum og hefur skreytt hús og glugga.
Fallegar skreytingar lyfta hug í hæðir rétt eins og uppáhalds jólalög og sálmar gera. Ég fann þetta jólatré sem er gert úr gamaldags ljósaperum á Skólavörðustígnum. Þetta er bæði snjöll og falleg útfærsla.