Blogg
Færslur um hvaðeina sem okkur þykir áhugavert. Notaðu hnappana til að sía eða flettu gegnum allt.
-
Það var þetta með frítímann
Á mbl.is er áhugavert viðtal við Mark C. Taylor, prófessor við Columbia háskóla. Hann segir meðal annars:
Hagfræðingurinn John Maynard Keynes hafi í fyrirlestri árið 1928 spáð því að eftir hundrað ár myndu allir aðeins þurfa að vinna 20 ár á viku. „Einu sinni var frítími mælikvarði á félagslega stöðu,“ segir hann. „Nú er það þannig að ef þú ert ekki tengdur allan sólarhringinn alla daga vikunnar ertu ekki mikilvægur. Sumir vinna því allt, allt of mikið. Aðrir vinna hins vegar allt of lítið. Þeir sem vinna of mikið eru flestir sérfræðingar á uppleið í efri stigum samfélagsins.“
Taylor er aðalfyrirlesari á málþingi sem Stofnun dr. Sigurbjörns Einarssonar heldur. Málþingið fjallar um stjórnleysi fjármálamarkaða og ósjálfbærni fjármálakerfisins og er öllum opið. Spennandi.
-
Hildur og barnið sem elskar
Hildur Eir Bolladóttir um ástarjátningu barnsins:
Þegar lítið barn segir við þig „ég elska þig“ þá upplifirðu sennilega hvernig hamingjan getur staðið samsíða óttanum um stund. Þegar barn segir við þig „ég elska þig“ er eins og þér sé skyndilega lyft frá jörðu og eitt augnablik færðu litið inn um gáttir himnanna þar sem ekkert fær staðist nema sannleikurinn einn.
Nákvæmlega.
-
Bikinivottorð fyrir sumarið?
Líkamsvirðingarbloggið er gott innlegg í opinbera umræðu hér á landi. Í dag bloggar Gabríela Bryndís Ernudóttir um bikinikroppa. Hún hefur eftir erlendum bloggara eitt gott sumarprinsip: Bikinikroppur er sérhver kroppur sem kemst í bikini. Stutt og laggott og skýrt enda eru bikinikropparnir allskonar.
Það eru góð skilaboð á gleðidögum að enginn eigi að þurfa að skammast sín fyrir líkamann sinn. Takk líkamsvirðingarbloggarar.
-
Marteinsvefur
Vefur okkar hjóna um Martein Lúther var einn þeirra sem duttu út um daginn. Nú er hann kominn í loftið á nýjum stað og reyndar með nýju útliti líka. Það er örlítið snurfus eftir, en þetta er að mestu leyti komið. Njótið hans vel.
-
#SethGodin, #Íþróttaálfurinn og #GeorgeBryant og tístið
Ég var í Háskólabíói í morgun og hlustaði á þrjá markaðsmenn flytja fyrirlestra um fræðin sín. Fyrstur á svið var George Bryant, á eftir honum kom íþróttaálfurinn Magnús Scheving og loks steig markaðsgúrúinn Seth Godin á svið. Ég sat með spjaldið í kjöltunni og tísti án afláts. Þetta gefur kannski örlitla innsýn í magnaðan morgun. Ég lærði heilmikið og fór heim innblásinn.
Takk Ímark.
-
Ralf, rústirnar og kirkjan
Ég messaði í Borgarholtsskóla í morgun. Þar er alltaf þemamessa og í dag var þemað tölvuleikir og bíó. Ég lagði út af kvikmyndinni um rústarann Ralf og talaði um hvort persónur – í tölvuleikjum og í lífinu – geta breyst og um mikilvægi vonarinnar. Þetta er góð mynd sem ég mæli með og hún átti vel við í Borgarholtsskóla þar sem fermingarbörnin eru stærstur hluti safnaðarins á sunnudögum.
-
Skrifum undir
„Við undirrituð skuldbindum okkur til þess að vinna af alefli og einurð gegn einelti í samfélagi okkar. Við munum standa vörð um rétt fólks til þess að lifa í sátt og samlyndi við umhverfi sitt. Við munum sérstaklega gæta réttar barna og ungmenna sem og einnig allra hópa sem ekki eiga sér málsvara eða sterka rödd.
Við munum öll hvert á okkar sviði, skuldbinda okkur til þess að hafa áhrif til góðs á nánasta umhverfi okkar. Við ætlum að vera góð fyrirmynd og leggja okkar af mörkum til þess að vinna bug á því samfélagslega böli sem einelti er.“
Í dag er góður dagur til að leggja nafn sitt við þjóðarsáttmála gegn einelti með undirskrift á vefnum. Svo skulum við öll leggja okkar af mörkum á baráttudegi gegn einelti 8. nóvember næstkomandi.
-
Nóvemberjólakakan hennar Nönnu
Nanna Rögnvaldar er uppáhalds matarbloggari. Í dag bloggar hún um jólakökuna sem gott er að gera um þetta leyti og leyfa svo að sjatna fram að þessum eða næstu jólum.