Árni og Kristín

Blogg

Færslur um hvaðeina sem okkur þykir áhugavert. Notaðu hnappana til að sía eða flettu gegnum allt.

  • Gleðidagur 44: Hvetja frekar en að skamma

    Það er kúnst að hvetja aðra til að breyta hegðun sinni til betri vegar án þess að detta í það að skamma með fingur á lofti. Myndböndin #ruslíReykjavík þar sem borgarstjórinn okkar veltir vöngum yfir ruslinu í borginni eru gott dæmi um jákvæða hvatningu.

    Hann er í hlutverki sögumanns sem er hugsi yfir draslinu á götunum. Í lok fyrsta myndbandsins má heyra hann hugsa með sér:

    Ég veit ekki hvaða aðili er að henda drasli á götur Reykjavíkur en mig langar að komast að því og mig langar að fara til viðkomandi og segja við manneskjuna:

    Ert þú að henda drasli?
    Já.
    Værirðu til í að hætta því?

    Hér er höfðað til samvisku og myndugleika borgaranna og við hvött til að líta í eigin barm. Þannig getum við einmitt komið á breytingum sem eru til góðs.

    Á fertugasta og fjórða gleðidegi viljum við þakka Jóni borgarstjóra fyrir árin hans fjögur í embætti borgarstjóra. Hann hefur verið ábyrgur, frumlegur og skapandi leiðtogi sem hvetur til góðra verka.

    Gleðidagarnir eru fimmtíu og standa frá páskum til hvítasunnu. Einu sinni á dag deilum einhverju uppbyggilegu og þakkarverðu með lesendum bloggsins okkar.

  • Gleðidagur 20: Múltíkúltí í Reykjavík

    Fjölmenningardagur er haldinn hátíðlegur í Reykjavík á morgun, laugardaginn 10. maí. Fjölmenningardagurinn er haldinn til að fagna fjölbreytileika í menningu og mannlífi sem borgin og borgarbúar njóta ríkulega.

    Á morgun hefst dagskráin kl. 13.00 með skrúðgöngu frá Hallgrímskirkju og niður Skólavörðustíg að Ráðhúsi Reykjavíkur. Þar verður markaður með handverki og mat frá ólíkum löndum.

    Við njótum fjölmenningarinnar á hverjum degi. Í morgun drukkum við ljósristað og ljúffengt kaffi frá Kólumbíu, við borðuðum indverskan mat í gærkvöldi og hjólum um á ensku og bandarísku hjólunum okkar.

    Á tuttugusta gleðidegi fögnum við yfir fjölbreytileika menningar og mannlífs og þökkum fyrir öll þau sem hafa flust hingað frá öðrum löndum og auðga lífið hér á Íslandi.

    Gleðidagarnir eru fimmtíu og standa frá páskum til hvítasunnu. Einu sinni á dag deilum einhverju uppbyggilegu og þakkarverðu með lesendum bloggsins okkar.